Carreg Ateb: Profiad AR
Gweithiodd CreuTech gyda Chwmni Ifanc Frân Wen a’r National Gallery i greu profiad AR rhyngweithiol oedd yn cyfuno mytholeg Gymreig, celf a helfa drysor drwy’r oriel.
Tyfodd Carreg Ateb o hanes paentiadau’r National Gallery yn cael eu diogelu yng nghwarel Manod yn ystod yr Ail Ryfel Byd, gan greu cysylltiad rhwng yr Oriel a thirwedd a straeon Gogledd Cymru.
Gan weithio’n uniongyrchol gyda’r Cwmni Ifanc, cynhaliwyd gweithdai creadigol i helpu i lunio’r naratif, y cymeriadau a’r rhyngweithio y tu ôl i’r profiad, gan wneud y bobl ifanc yn rhan o’r broses greadigol yn hytrach na dim ond profi cysyniad gorffenedig.
Helfa drysor drwy’r National Gallery
Gan ddefnyddio eu ffôn, roedd rhaid i ymwelwyr chwilio am baentiadau penodol yn y casgliad a’u sganio er mwyn symud ymlaen. Roedd pob darganfyddiad yn datgloi cwestiwn, gyda’u hatebion yn siapio’r cymeriad mytholegol roedden nhw’n ei greu wrth fynd.
Roedd hyn yn troi edrych ar baentiadau yn rhan o’r gêm: dod o hyd iddo, ei sganio, edrych arno, gwneud dewis a pharhau â’r daith. Mae’r National Gallery yn disgrifio’r profiad fel taith ryngweithiol drwy ei gasgliad, lle mae pob dewis yn cyfrannu at greu cymeriad mytholegol unigryw.
Eich cymeriad yn dod allan o Annwn
Ar ôl dod o hyd i’r paentiadau ac ateb y cwestiynau, roedd ymwelwyr yn cael eu harwain at leoliad olaf yn yr Oriel.
Yma roedd y daith yn cyrraedd ei huchafbwynt: agorodd porth AR i Annwn, a neidiodd y cymeriad oedd wedi’i greu drwy eu dewisiadau allan o’r porth ac i’r byd go iawn.
Roedd y canlyniad yn dod ag AR, mecaneg gemau, adrodd straeon a chasgliad y National Gallery at ei gilydd i droi ymweliad â’r oriel yn antur fytholegol bersonol.
Dylunio’r daith
Fe wnaethom ddylunio’r UI a’r llif rhyngweithio oedd yn tywys ymwelwyr drwy’r helfa drysor, o gyfarwyddiadau a chliwiau i sganio paentiadau, ateb cwestiynau a symud ymlaen tuag at ddatgeliad terfynol eu cymeriad.
Roedd angen i’r rhyngwyneb gadw’r profiad yn syml ac yn reddfol, tra’n dal i deimlo’n rhan o fyd Carreg Ateb, gan adael i’r gwaith celf, y stori a’r eiliadau AR aros yn ganolbwynt.
